Propuesta de terminoloxía educativa
Rodrigo Fernández Joglar
Pedagoxía: Disciplina que tien como oxetu d'estudiu la educación, en tantes que fenómenu típicamente social y específicamente humanu. Cast.: pedagogía.|| pedagoxía hospitalaria: Estaya educativa que tien como oxetivu la educación del neñu hospitalizáu, favoreciendo que siga'l so deprendimientu cultural y formativu y ayudándolu a enfrentase a la so enfermedá, enfotándose nel cuidáu personal y la prevención. Cast.: pedagogía hospitalaria. ?|| pedagoxía llaboral: pedagoxía ocupacional. Cast.: pedagogía laboral || pedagoxía llibertaria: Corriente pedagóxica qu'entiende la educación como daqué intrínseco a toa rellación humana y que trata de construyir un individuu llibrepensador, consciente y críticu, eliminando les llendes ente profesor y alumnu. Cast.: pedagogía libertaria.|| pedagoxía ocupacional: Estaya de la pedagoxía qu'estudia el mundo del trabayu, poniendo especial enfotu nos aspeutos formativos y d'inxerimientu llaboral. Cast.: pedagogía ocupacional.|| pedagoxía social: Estaya pedagóxica encargada de la intervención pedagóxica nos servicios sociales pa la prevención, l'ayuda y la resocialización. Cast.: pedagogía social. || pedagoxía terapéutica: Estaya de la pedagoxía encargada de trabayar tolo rellacionao colos encontos y refuerzos necesarios na atención a les Necesidaes Educatives Especiales. Cast.: pedagogía terapéutica.|| pedagoxía xerontolóxica: Estaya de la pedagoxía que tien como campu de trabayu l'atención a les necesidaes de la tercera edá. Cast.: pedagogía gerontológica.