Propuesta de terminoloxía educativa
Rodrigo Fernández Joglar
formación: Aición y efeutu de formar y formase. Cast.: formación.|| formación básica:formación d'aniciu. Cast.: formación básica.|| formación continua: Conxuntu d'aiciones formatives desendolcaes por empreses, trabayadores o organizaciones de calter destremáu col enfotu d'ameyorar la cualificación profesional individual de la persona. Cast.: formación continua.|| formación del profesoráu: Procesu formativu de calter profesionalizador pa la enseñanza. Cast.: formación del profesorado.|| formación d'aniciu: Númberu mínimu d'aiciones de formación afitaes oficialmente y esixíes pa entamar a trabayar como profesor dafechamente cualificáu, d'alcuerdu coles polítiques educatives d'un país. Cast.: formación inicial.|| formación integral: Conceición de la formación como una estratexa global, p'algamar la formación plena d'un profesional. Cast.: formación integral.|| formación profesional: Conxuntu d'enseñances que, dientro del sistema educativu, capaciten a les persones pal desempeñu d'un trabayu cualificáu nes distintes profesiones. Cast.: formación profesional.|| formación ocupacional: Aición formativa enmarcada na estaya de la educación permanente y, más en concreto, nel ámbitu de la educación d'adultos, que tien por oxetivu ufrir una cualificación adecuada pa facilitar l'accesu al mundu llaboral y la meyora de les competencies profesionales de los trabayadores ocupaos. Cast.: formación ocupacional.|| formación virtual:Estaya de la formación desendolcada al traviés de la rede. Cast.: formación virtual.