Propuesta de terminoloxía educativa
Rodrigo Fernández Joglar
educación: Procesu multidireicional per aciu del cual les nueves xeneraciones asimilen y deprienden conocimientos, normes de conducta, maneres de ser y de ver el mundu, creando amás otros nuevos. Cast.: educación. || educación cívica: Estaya pedagóxica que trabaya les rellaciones sociales, tresmitiendo les regles de convivencia democrática y ciudadana dende una perspeutiva crítica y enfotándose en fomentar les aptitúes de collaboración y participación n'actividaes cíviques. Cast.: educación cívica. || educación comparada: Estaya pedagóxica que tien como finxu descubrir, conocer, esplicar y comparar les carauterístiques de los sistemes educativos nos diferentes países del mundu. Cast.: educación comparada. || educación compensatoria: Conxuntu de programes educativos dirixíos a garantizar l'accesu, la permanencia y la promoción nes etapes obligatories del sistema educativu del alumnáu en situación de desventaxa social, por cuenta razones étniques o socioeconómiques, col envís de garantizar el principiu d'igualdá d'oportunidaes n'educación. Cast.: educación compensatoria. || educación comprensiva: Conceición del procesu d'enseñanza-deprendimientu que trata d'ufiertar a tolos alumnos d'una determinada edá un bon nucleu de conteníos comunes, pa evitar asina la segregación o separtación tempranes de los escolinos que pudieren ser irreversibles más alantre. Cast.: educación comprensiva. || educación d'adultos: Estaya de formación afitada na educación permanente, qu'abre una vía pa que cualesquier persona pueda, independientemente de la so edá, acceder al sistema educativu pa satisfacer les sos necesidaes educatives. Cast.: educación de adultos. || educación en valores: educación cívica.Cast.: educación en valores. || educación especial: Estaya de la educación que s'ocupa d'atender a aquellos escolinos con necesidaes educatives especiales. Compriende toles actividaes dirixíes a compensar estes necesidaes. Cast.: educación especial. || educación física: Estaya pedagóxica que centra la so intervención nel movimientu corporal pa estructurar primero y desendolcar dempués, de forma integral y armónica, les capacidaes físiques, afeutives y cognitives de la persona, cola finalidá d'ameyorar la calidá de la participación humana nos distintos ámbitos de la vida, familiar, social y productiva. Cast.: educación física. || educación formal: Estaya de la educación de calter intencional, planificáu y reguláu qu'abarca tola ufierta educativa asitiada dientro de la escolarización obligatoria, dende la educación infantil a la secundaria, con unes enseñances concretaes dientro d'un currículu oficial y nun horariu y calendariu definíos. Cast.: educación formal. || educación inclusiva: Conceición d'educación que se sofita na aceutación de la diversidá en términos de normalidá, valorando de mou esplícitu la esistencia d'esa diversidá. Cast. educación inclusiva. || educación infantil: Primer nivel educativu del sistema español, gratuitu y non obligatoriu, formáu por un primer ciclu de 0 a 3 años, impartíu nes escueles infantiles, y un segundu ciclu de 3 a 6 años, impartíu nun centru d'educación infantil o d'educación infantil y primaria. Cast.: educación infantil. || educación informal: Estaya de la educación qu'implica un procesu de deprendimientu continuu y espontaneu, que tien llugar fuera del ámbitu de la educación formal y non formal, en situaciones cotidianes de contautu social. Cast.: educación informal. || educación intercultural: Estaya de la educación que pon enfotu na concienciación de los escolinos na interaición respetuosa ente cultures. Cast. educación intercultural. || educación nel ámbitu rural:Estaya pedagóxica que trabaya na conocencia del desendolcu de l'aición educativa en contestos rurales, col envís d'ufiertar propuestes que meyoren l'adautación contestual del sistema educativu a eses situaciones, pa poder ufrir asina un serviciu non discriminatoriu nin de calidá inferior con respeuto a un contestu más urbanu. Cast.: educación en el ámbito rural. || educación non formal: Estaya de la educación qu'abarca a toes aquelles instituciones, ámbitos y actividaes educatives que, ensin ser escolares, creáronse pa satisfacer unos oxetivos determinaos. Cast.: educación no formal. || Educación pa la Ciudadanía y los Derechos Humanos (EpC): Xera diseñada pal tercer ciclu de la Educación Primaria y pa la Educación Secundaria d'alcuerdu cola LOE, que tien como oxetivu la enseñanza de los valores democráticos y constitucionales. Cast. Educación para la Ciudadanía y los Derechos Humanos (EpC). Ver t. educación cívica. || Educación pa la Paz: Procesu educativu continuu y permanente qu'al traviés de l'aplicación de métodos problematizantes nagua por desendolcar un tipu nuevu de cultura, la cultura de la paz, qu'ayude a les persones a descubrir críticamente la realidá, desigual, violenta, complexa y conflictiva pa poder asitiase énte ella y actuar darréu. Cast. Educación para la Paz. || Educación pal Desarrollu: Procesu educativu empobináu a xenerar conciencia crítica sobre la realidá mundial y a ufrir ferramientes pa la participación y tresformación social, sobre manera en tolo referío a aiciones de xusticia y solidaridá. Cast.: Educación para el Desarrollo. || educación permanente: Corriente educativa que tien como oxetivu llevar la educación a tolos niveles de la vida del ser humanu, pa qu'a cualesquier persona-y seya posible tanto recibila como llevala a cabu. Nun tien que tracamundiase cola educación d'adultos, porque ésti ye un términu de calter más específicu. Cast.: educación permanente. || educación plástica: Estaya educativa que tien como oxetivu desendolcar el potencial creativu, afeutivu y sensible de les persones. Cast.: educación plástica. || Educación Primaria: Etapa educativa obligatoria, que se cursa enantes de la Educación Secundaria Obligatoria (ESO) y qu'afita una correuta alfabetización deprendiendo a lleer, escribir, cálculu de nivel básicu y cultura xeneral. Cast.: Educación Primaria. || educación pública: Sistema educativu nacional d'un país, que compriende polo xeneral la planificación, supervisión y execución direuta de planes d'estudiu y educación escolarizada nos distintos niveles académicos, siendo los principales los obligatorios, anque ensin escluyir por ello a los superiores non obligatorios. Cast.: educación pública. || educación concertada: Vía educativaque se sofita con fondos públicos pero de titularidá y xestión privada. Cast.: educación concertada. || educación privada: Vía educativa qu'ufierta servicios educativos financiaos al traviés de cuotes establecíes polos propios centros que la imparten. Cast.: educación privada. || Educación Secundaria Obligatoria (ESO): Etapa educativa obligatoria, que se cursa dempués de la Educación Primaria y enantes del Bachilleratu y que tien calter terminal pa dellos estudiantes, al ser la cabera etapa educativa obligatoria, y calter propedéuticu pa otros, porque permite l'accesu a niveles superiores. Cast.: Educación Secundaria Obligatoria (ESO). || educación sexual: Conxuntu de deprendimientos que permiten el bon desendolcu de la identidá y de les capacidaes sexuales y la so coordinación coles otres facultaes p'algamar una bona interrellación coles demás persones, llogrando niveles altos d'espontaneidá y comunicación, asina como de respetu y estima. Cast.: educación sexual. || educación segregada: Modalidá educativa que separta a los escolinos según el so sexu. Cast.: educación segregada.