Propuesta de terminoloxía educativa
Rodrigo Fernández Joglar
diagnósticu educativu (~ diagnósticu pedagóxicu): Actividá científica, teórico-téunica, inxertada nel procesu d'enseñanza-deprendimientu, que consiste nun procesu d'indagación científica, apoyáu nuna base epistemolóxica empobinada al conocimientu y valoración de cualesquier fechu educativu col envís de tomar una decisión pa la meyora del procesu d'enseñanza-deprendimientu. Pue incluir actividaes de detección, midición, estimación-valoración y evaluación. Cast.: diagnóstico educativo (~ diagnóstico pedagógico). || prueba diagnóstica: Evaluación xeneral de rendimientu escolar (competencies básiques) en determinaos niveles obligatorios prescrita pola Alministración pa identificar ámbitos de meyora.