lliberalismu, el: sust. Cualidá de lliberal. 3 Réxime políticu y económicu lliberal. a Actitú que defende la llibertá y la tolerancia nes rellaciones humanes. b Doctrina política que defende les llibertaes y la iniciativa individual y pon llendes a la intervención del Estáu y de los poderes públicos na sociedá. || Lliberalismu económicu, doctrina económica qu’afirma que ye posible organizar la vida económica y política de les sociedaes alredor de la llibertá, como valor supremu, favorecindo una economía de mercáu, onde se reduza a lo indispensable la intervención estatal. Sicasí, col tiempu, el lliberalismu económicu cuida conveniente la función del Estáu en dellos aspeutos de la economía rellacionaos colos servicios públicos y considera necesaria la intervención del Estáu na construcción d’un marcu xurídicu y normativu pal desarrollu de la economía llibre de mercáu. || Friedman y el lliberalismu económicu, Milton Friedman (1912-2006), estadounidense, economista ultralliberal, fue consideráu’l líder de la Escuela de Chicago, defensora abondo del lliberalismu económicu. Pon munches torgues a la intervención del Estáu, sofítase na llibre competencia y ye partidaria de la llucha escontra la inflación usando’l control de la ufierta monetaria. Premiu Nobel en 1976 polos sos trabayos sol analís del consumu, la historia monetaria y la política d’estabilización. Friedman ye la lluz qu’alluma a cuasi tolos economistes neolliberales.

Pallabra:

Términos básicos d'Economía y Empresa

Guillermo Ovidio Villa Balbona
Fernanda Valdés Rodríguez