inflación, la: sust. Xuba [de los precios que se produz al desaxustase la ufierta y la demanda]. a Aumentu sustancial y sosteníu del nivel xeneral de precios a lo llargo d’un tiempu determináu, que se mide col IPC (índiz de precios al consumu), y combátese con la xuba de los tipos d’interés. || Hiperinflación, inflación que crez ensin midida, que suel orixinase cuando l’alministración emite ensin control dineru pa cubrir los sos gastos. b Gran alza de los precios qu’obliga a les persones a desfacese del dineru que tienen nel so poder. || Inflación al galopiu, hiperinflación. || Inflación de costos, inflación que tien l’orixe nel crecimientu autónomu de dalgún de los componentes del costu (sueldos, gastos bancarios, primeres materias, productos semiellaboraos, etc). || Inflación de demanda, Inflación causada pola mor del crecimientu aceleráu de la demanda agregada, que se produz pol aumentu del consumu priváu, o pol incrementu del gastu públicu, o por más inversiones o esportaciones, etc. || Inflación estructural, inflación orixinada por un desequilibriu básicu na estructura ecómica del país.

Pallabra:

Términos básicos d'Economía y Empresa

Guillermo Ovidio Villa Balbona
Fernanda Valdés Rodríguez